قصة فتاه سجد لها الشيطان
شهد ١٨ سنة وحيدة ابوها وامها ..اولي تجارة انجليش كعادتها تقضي معظم وقتها في غرفتها امام اللاب توب.. الفايسبوك مفتوح دائما لا يغلق نهائيا لديها صفحة يتابعها الكثيرين من مختلف البلدان فمنشوراتها الجريئة الشاذة عن الجنس وغيره جذبت اليها عيون الكبار قبل الشباب ممن يعشقون هذا النوع من المنشورات وخاصة عندما تكون من فتاه جريئة مثلها لديها اصدقاء من مختلف البلدان تتحدث معهم في كل شئ وهي الان تتحدث مع هيثم من لبنان
هيثم .. ايه مش ناوية تحني وتفتحي الكاميرا ؟
شهد .. لا يا حلو .. بنكسف
هيثم .. متخفيش هودي وشي بعيد
شهد .. ههههه .. ولما تودي وشك بعيد هتشوفني ازاي ؟!!
هيثم .. كفاية قلبي يشوفك يا جميل
شهد .. طيب لو عايز تشوفني اعمل اللي اقلك عليه
هيثم .. ماشي .. عايزاني اعمل ايه ؟
شهد.. عاوزاك تفتح الكام وتجيب ما يكاب وتحط في وشك قدامي لحد ما اصدق انك بنت
هيثم .. نعم ؟!! مايكاب .. انتي شايفاني بنت .. انا راجل يا ماما
شهد .. خلاص وانا مفتحش الكاميرا لراجل
هيثم .. انتي اكيد مجنونة
شهد .. انا مجنونه يا اهبل انت .. بلوك .. يلا في ستين داهية
الام تفتح باب الحجرة وتنظر اليها في تعجب
الام .. بتعملي ايه يا شهد ؟!!
شهد .. ولا حاجة يا ماما قاعدة ع الفيس
الام .. ايوه بتعملي ايه في البتاع ده
شهد .. كنت بكلم هيثم من لبنان
الام .. وده زميلك في الكلية يعني ؟!!
شهد .. كلية ايه يا ماما دا صديقي ع الفايس من لبنان
الام .. يا بنتي انتي قاعدة تكلمي ناس متعرفهاش ؟!!
شهد .. لا خلاص عملتله بلوك
الام .. ودا ايه دا كمان ؟!!
شهد .. مش هتفهمي يا ماما .. انتي عاوزة حاجة ؟؟
الام .. عايزاكي تقومي تساعديني شوية في شغل البيت
شهد .. كل يوم تطلبي مني الطلب ده مع انك عرفه الاجابة كويس .. اسفه
الام .. يا بنتي عيب قومي اعملي حاجة معايا .. اتعلمي حاجة تنفعك لما تتجوزي .. اشحال مكنتيش بنت
شهد .. لا انا مش هتجوز .. انا عايزه اكون عانس
الام .. يا ساتر يارب .. في بنت تقول كدا ؟!!
شهد .. بصي انا الحاجة اللي البنت متقلهاش تلاقيني قلتها واللي متتعملش تلاقيني عملتها علطول .. فهماني ؟
شهد .. مش فهماكي والله .. طب قومي البسي حاجة تقيلة علي جسمك في بنت تقعد بشورت وحمالة في عز البرد .. بعدين هتعيي
شهد .. بالعكس انا حاسة ان الجو حر جدا
الام .. حر ايه بس وبعدين اوضتك ريحتها سجاير !!
شهد .. لا دي سيجارة كدا تفاريح
الام .. يا حول الله يارب .. مش قلنا نبطل شرب سجاير ؟!! يا بنتي عيب ميصحش وبعدين صدرك يتعب .
شهد .. متخفيش لو تعبت هبقي اكشف عند اسلام جارنا .. هو مش بتاع حساسية وصدر ووراك ورجول وكدا يعني
الام .. لا انتي لما يجي ابوكي يشفلة صرفة معاكي انا مبقتش قادرة عليكي ومبتسمعيش الكلام
شهد بسخرية .. كل مرة تقولي كدا وبتقوليلة ومبيعمليش حاجة .. فمتتعبيش نفسك وتقوليلة لانه مش هيعملي حاجة
الام .. لا انتي اتمرعتي علينا اوي .. ماشي يا شهد
ثم تتركها وتنصرف .. شهد تلاحظ رسالة غريبة علي الماسنجر الاكونت باسم الشيطان تتعجب للأسم والبرفيل الذي يحمل صورة مخيفة .. الرسالة تقول .. خلصتي كلام مع ماما .. مستنيكي من بدري
شهد تتعجب وترسل له رستا .. انت مين ؟!!
الشيطان.. انا الشيطان
شهد بسخرية .. تصدق خفت .. طب انصرف يا شيطان
الشيطان .. انتي مش حاسة بالبرد وانتي قاعدة كدا؟!! .. بس بجد جسمك جميل ورشيق
شهد تشك ان الكام مفتوحة ولكن تجدها مغلقة
الشيطان .. الكاميرا مقفولة متقلقيش .. انا مش محتاج كاميرا عشان اشوفك
شهد .. انت شايفني بجد ؟!!
الشيطان .. ايوة
شهد .. طب انا لابسة ايه ؟
الشيطان .. لابسه شورت ابيض وتي شيرت كت بمبي
شهد تنظر الي ملابسها فتتعجب كيف يراها ؟!!
الشيطان .. اتأكدتي اني شايفك ؟!!
شهد .. انت مين وعايز ايه ؟؟!!
الشيطان .. عاوز نكون اصدقاء
شهد .. انت ازاي شايفني ؟!!
الشيطان .. لو مشفتكيش مبقاش شيطان
شهد .. يعني انت مش انسان زينا ؟!!
الشيطان..انا لو انسان مش هقدر اشوفك .. فين ذكائك يا شهد ؟!!
شهد .. انت تعرف اسمي كمان ؟!!
الشيطان .. انا اعرف عنك كل شئ
شهد تحاول حظرة ولا يتم الحظر .. تتعجب لذلك
الشيطان .. ليه كدا ؟!! بلوك من اولها !! طب شوفي باباكي وارجعيلي
ثم يدخل الاب علي شهد .. شهد في ذهول شديد
دخل والد شهد غرفة شهد حيث تحادث علي الماسنجر شخص مجهول يسمي نفسه الشيطان اصابها بالحيرة والدهشه لانه اخبرها بأشياء دون ان يراها
والد شهد .. وبعدين معاكي هتفضلي اليوم كله علي الزفت ده ويقصد اللاب توب ؟!!
شهد .. كمان ساعتين تلاتة واخلص متقلقش انت بس
والد شهد .. طب قومي عشان تتغدي معانا
شهد .. كلوا انتوا انا مش جعانة دلوقتي
والد شهد .. يا بنتي اسمعي الكلام ولو مرة في حياتك
شهد .. وبعدين معاك يا حمدي روح يلا مش فاضيالك عاوزه اعرف مين الحيوان ده اللي بيكلمني
والد شهد .. حيوان مين ؟!!
شهد .. بعدين ابقي اقلك ما انا بحكيلك كل حاجة.. روح يلا يا حمدي واقفل الباب وراك
والد شهد.. طب قومي البسي حاجة تقيلة الجو برد
شهد .. لا مش عاوزه البس حاجة تقيلة.. حرانة موووووت .. امشي بقي يا حمدي بلاش رخامة
والد شهد .. حاضر يا شهد لما اشوف اخرتها معاكي
ثم يخرج ويغلق باب الحجرة خلفة وشهد تعود لتكلم هذا المجهول مرة اخري
شهد ترسل له رسالة .. معايا؟
الشيطان .. مستنيكي من بدري .. وبعدين عيب اوي تقولي عليا حيوان !!!
شهد .. ايه ده .. هو انت سامعني بجد؟!!
الشيطان .. سامعك وشايفك .. انتي لسة مش مصدقة
شهد .. انت قلتلي انت جنسك ايه ؟!!
الشيطان .. خلي الجنس ده بعدين هتعرفيه لوحدك
شهد .. وعايز ايه بقي مني ؟!!
الشيطان .. قلتلك .. نكون اصدقاء
شهد .. اه .. طيب واشمعني انا ؟!!
الشيطان .. لا انا عندي اصدقاء كتير بس انتي هيكون اقرب صديق ليا
شهد .. اشمعني برضوا
الشيطان .. لانك تشبهيني في حاجات كتير
شهد .. طب انا صايعة .. وانت صايع ؟!!
الشيطان .. انا صايع وضايع وفلاتي وفاجر وكل الصفات الوحشة تلاقيها فيا .. تمام ؟
شهد .. تمام .. عرفت انك وسخ
الشيطان .. هتشتمي تاني ؟
شهد .. خلاص متزعلش يا عم الشيطان
الشيطان .. شوفي انا عاوز اعمل معاكي اتفاق
شهد .. اتفاق!! ايه هو؟!!
الشيطان .. عاوزك تعملي خمس مصايب .. لو نفذتيهم .. هنفذلك اي طلب تطلبيه
شهد .. مش فاهمة ؟!!
الشيطان .. سهله يا شهد .. هتعملي خمس مصايب ومش جديد عليكي انتي استاذة مصايب ولو نفذتيهم هنفذلك اي طلب تطلبيه
شهد .. مصايب .. اه .. طيب دي حاجة بسيطة انا اصلا بلوة مسيحة
الشيطان .. عارف .. عشان كدا اخترتك تكوني افضل اصدقائي
شهد .. بس انا عايزة اعرف انت مين ؟!! وشايفني ازاي ؟!!
الشيطان .. حقيقتي هتنكشف ليكي لوحدها بمجرد ما تنتهي من الخمس مصايب
تمام .. تحب اولع في البيت وفي ابويا وامي ونبقي عملنا خمس مصايب جملة.. هههههه
الشيطان .. لا .. انا اللي هختار الخمس مصايب وانتي عليكي تنفذي
شهد .. طب وانا لو طلبت اي شئ هتنفذهولي .؟!!
الشيطان .. اكيد
شهد .. طب انا عاوزة فيزا لاميريكا مش عاوز ه اقعد في مصر زهقت وقرفت من دي بلد .. تقدر تجيبلي فيزا ؟
الشيطان .. هتكون عندك وممكن اديلك الجنسية كمان .. اتفقنا ؟!!
شهد .. اتفقنا ولو طلعت كداب في النهاية ؟
الشيطان .. لا متخفيش .. وجربي صدقيني هتكسبي الشيطان
لم تدرك شهد معني تلك الجملة الا بعد فوات الاوان ..
الشيطان .. نبدأ ولا هتخافي وتطلعي عيلة
شهد .. ابدأ .. مش شهد ياض اللي تخاف
الشيطان .. وائل اللي معاكي في الكلية
شهد .. وائل احسان ؟!!
الشيطان .. ايوه
شهد .. ماله زفت ؟!!
الشيطان .. عاوز يتجوزك عرفي وبعتل كذا مره مع اسراء صحبتك
شهد .. ايوه لأن هي اصلا متجوزة عرفي من هشام صحبه
الشيطان .. اقبلي واتجوزيه
شهد .. نعم
شهد .. نعم !!! اتجوزه عرفي ازاي بقي ؟!!
الشيطان.. زي اسراء صحبتك
شهد .. وده عشان ايه يعني اعمل كدا ؟!!
الشيطان .. اولا عشان انتي شهد اللي بتعمل اي حاجة في اي وقت.. ومبيهمهاش حد خالص عكس البنات كلها .. وبعدين احنا اتفقنا ولا انتي خفتي وهترجعي في اتفاقك معايا
شهد .. انا مبخفش ياض .. لو انت شيطان انا شهد اللي علمتك الشيطنه
الشيطان .. انا يشرفني تكوني استاذتي .. بس خلي بالك لو بدأتي معايا وتراجعتي بعد كدا متزعليش مني
شهد .. انت بتهددني ؟!!
الشيطان .. مش بهددك .. انا بعرفك بس
شهد .. اوك اتجوزه عرفي هي اسراء احسن مني لما اتجوزت هشام وبعدين هو هيموت عليا فعلا
الشيطان .. تمام ..فلنبدأ اللعبه
ذهبت شهد تاني يوم الي الكليه واخبرت اسراء بأنها توافق علي زواجها من وائل وفرحت اسراء واخبرت هشام الذي اخبر وائل وبالفعل تزوجا الاثنان عرفيا وكانا يتقابلان سرا في شقة والد وائل لأن ابواه كانا مسافرين خارج مصر للعمل بإحدي الدول العربيه .. وبعد اسبوع اثناء تنظيف ام شهد لحجرتها رأت بالصدفه ورقة الزواج العرفي كادت تسقط مغشيا عليها من هول الصدمة واجهت شهد بالورقة فأعترفت انها متزوجة عرفيا من صديق لها بالكلية فقامت الام باخبار الوالد ليجد حلا لتلك المصيبة
والد شهد .. انتي ايه اللي عملتية ده؟!! انتي ازاي تعملي كدا ؟!!
شهد بكل برود .. معملتش حاجة غلط انا متجوزة عرفي ودي الموضه دلوقتي بين البنات والولاد
والد شهد .. موضه !!! موضة ايه دا جواز .. انتي خلاص بقيتي فاجرة للدرجه دي
الام .. انت السبب انت اللي دلعتها .. ياما قلتلك شد عليها دي بنت .. وانت تقلي لا هي اللي حيلتنا .. ادي النتيجة
والد شهد .. الواد ده يجي يقابلني بكرة عشان نشوف حل في المصيبة دي يا خسارة يا شهد
في اليوم التالي تحدثت شهد مع وائل واخبرته بأن اهلها قد عرفوا قصة زواجهما وان والدها يريد مقابلته
شهد .. لازم تيجي تقابل بابا بكرة
وائل.. ليه ؟!!
شهد .. يعني ايه ليه ؟!!
وائل .. بقلك عرف كل حاجة وعايزك تتجوزني رسمي
وائل .. اتجوزك رسمي ليه ؟!!
شهد .. هو احنا مش متجوزين عرفي ؟!!
وائل .. كنا متجوزين عرفي .. انا قطعت الورقة وحياتك بعدها بيوم
شهد .. هو انت مش كنت بتحفي عليا عشان تتجوزني عرفي وبتقلي بحبك وبموت فيكي ومقدرش اعيش من غيرك واعمل اي حاجة عشان افضل جمبك ؟!!
وائل .. ههههه .. دا كلام عشان اوصل لغرض في دماغي ووصلتله خلاص .. بس تصدقي انتي فعلا كنتي ممتعه يا بنت الايه
شهد .. اه يا واطي يا ابن الكلب
ثم تصفعة بالقلم علي وجهه
والد شهد يعلم بما حدث فيسقط من طوله ويصاب بجلطة في القلب من شدة الانفعال جعلته مصاب بالشلل
شهد تحزن بعض الوقت ولكن هل ستكتفي بالمصيبة الاولي ؟؟
ظلت شهد حزينة بعد اصابة والدها بالشلل ولكن ليس الحزن الذي سيجعلها ستعود الي رشدها وتكف عن فعل المصائب التي تعودت عليها واصبحت شئ عادي في حياتها واثناء جلوسها جائها اشعار برسالة من الشيطان الشخص المجهول فتحتها ..
الشيطان .. زعلت اوي علي فكرة من اللي حصل ده بس مش عاوزه يأثر عليكي ويخليكي تتخلي عن مبدأك في الحياه .. لا تراجع ولا استسلام يا شهد
شهد.. عاوز ايه تاني يا زفت انت
الشيطان .. هتغلطي تاني لسانك طويل دايما ومتبري منك كدا علطول !!!
شهد .. عشان انت السبب في كل ده
الشيطان .. ومن امتي بيفرق معاكي يا شهد ؟!!
شهد .. ماشي بس المره ده بابا اتشل بسببي
الشيطان .. هتكملي ولا هتستسلمي ؟؟
شهد .. عند فيك هكمل .. قلي بقي ايه المصيبة التانية ؟!!
الشيطان .. علاء جاركم
شهد .. ماله علاء دا انسان محترم جدا ومؤدب
الشيطان .. هههههه .. عشان الصفات الجميلة دي كلها .. هتطلعي بكره ع النيابة وتبلغي ان هو اعتدي عليكي بعد ما خدرك في شقته بحجة ان مامته تعبانه وانتي زرتيها عشان جارتك
شهد .. ايه الهبل ده .. ازاي عاوزني اعمل كدا؟!!
الشيطان.. انتي نسيتي انك مبقتيش بنت ؟!
شهد .. ما انا كنت متجوزه من الواطي اللي اسمه وائل ومعايا ورقة بكدا
الشيطان .. هههههه .. الورقة اتاخدت من شنطتك امبارح ووصلت لوائل وقطعها ميت حته
شهد تقوم بسرعة وتبحث عن الورقة في شنطتها ولم تجدها
الشيطان .. هههههه .. نفسي تصدقيني مره
شهد .. ازاي !!! مين اخدها ؟!!
الشيطان .. صحبتك الانتيم .. اسراء
شهد .. السافلة بنت الكلب
الشيطان ..هي سافلة فعلا عشان رضيتلك انك تتجوزي عرفي زيها .. يعني محدش دلوقتي هيصدق انك كنتي متجوزة واثبتي بقي يا شهد ...
شهد .. والحل ؟
الشيطان .. قلتلك ع الحل من شوية .. مفيش غير علاء يصلح غلطة وائل .. شغلي مخك يا صايعة .. لا لا لا مش عجباني يا شهد خالص
شهد .. علاء .. ممكن برضوا
شهد سمعت الكلام لانها في الاساس مبتحبش تسمع غير الكلام الغلط وطلعت علي النيابة وادعت ان علاء اغتصبها بعد ما حطلها مخدر في كباية عصير وهي في شقته بتسلم مع مامته التعبانه والنيابه بالقبض علي علاء وواجهته بالاقوال دي
وكيل النيابة .. انت تعرف البنت دي يا علاء
علاء.. اه طبعا دي شهد جارتنا بنت اونكل حمدي .
وكيل النيابة .. شهد متهماك انت اعتديت عليها جنسيا بعد ما وضعت ليها مادة مخدرة في كوب عصير قديمتهلها اثناء زيارتها لمامتك المريضة في شقتكم
علاء .. ايه ؟!! ازاي ؟!! مش معقول !! لا محصلش طبعا
شهد .. بطل كدب بقي يا علاء اعترف احسنلك بدال ما تتنفخ يا بني
علاء .. لا طبعا دي كدابه .. دي عمرها ما دخلت شقتنا ولا زارت امي.. طول عمرها مغرورة ومناخيرها فوق ومبتعرفش واجب ولا احترام لحد
وكيل النيابة .. يعني محصلش منك كدا ؟
علاء .. والله العظيم ما حصل يا فندم .. اسأل عني حضرتك في البيت وجيرانا في الشارع .. انا طول عمري في حالي
وكيل النيابة .. ايه رأيك يا شهد في الكلام ده؟
شهد .. كداب وبجح .. ولازم يكدب مش هيعترف بسهولة انا عرفة .
علاء .. يخرب بيتك اعترف بايه ؟!! انتي عاوزة تلبسيني مصيبة وخلاص .. روحي شوفي مين ضحك عليكي وجايه ترمي بلاكي عليا
شهد .. انا ارمي بلايا عليك انت يا معفن .. انا اصلا مستنضفكش .. بس انت اللي واطي وغدرت بيا .. انت حطتلي ايه بالظبط في العصير ؟!!
علاء .. عصير ايه ؟!! متصدقهاش يا فندم .. دي كدابه
وكيل النيابة .. بصي يا شهد .. انا لازم اعرضك علي الطب الشرعي عشان اتأكد من ادعائك
شهد .. ودا عشان ايه يعني؟
وكيل النيابة .. عشان نعرف اذا كنتي عذراء ولا لا .
شهد .. لا مش عذراء .. ثم تبكي وتقول .. منك لله يا علاء يا ابن طنط الفت
علاء متعجب .. يخرب بيتك !!
وكيل النيابة يأمر بحبس علاء احتياطيا وعرض شهد علي الطب الشرعي .. شهد تخرج لسانها لاستفزاز علاء
ترجع شهد الي المنزل وتجد امها في انتظارها
الام .. انتي صحيح كنتي في النيابة انهارده ؟
شهد .. ايوة
الام .. ليه ؟
شهد .. قدمت بلاغ في علاء جارنا
الام .. بلاغ ايه ده ؟
شهد .. اهو بلاغ وخلاص
الام .. انتي رحتي قلتي ان هو اعتدي عليكي ؟!
شهد .. اه
الام .. يا اخي جالك اوي يأويكي .. هو الواد جه ناحيتك ولا لمسك .. مش انتي اللي اتلميتي علي عيل فاسد واتجوزتيه عرفي
شهد .. واهو سابني وخلع الواطي الندل
الام .. تقومي تلبسيها لعلاء جارك
شهد .. اهو اللي جه في دماغي بقي .. جارنا ولازم يستحمل والنبي وصي علي سابع جار
الام .. النبي وصي علي سابع جار عشان نحسن اليه مش نلبسه مصيبة ونضيع مستقبله.. حرام عليكي دا امه هتموت عليه
شهد .. علي ايه جاتها نيله .. دا حتي عيل اهبل وعبيط ومبيعرفش يتكلم كلمتين علي بعض
الام .. هو المتربي ابن الناس بقي اهبل وعبيط يا شهد ؟!! مش هتجبيها لبر يا بنت بطني
الام .. انتي فكرك يعني لما عملتي كدا هيصدقوكي ؟!! دا انتي لو طلعتي كدابه هيبهدلوكي ويحبسوكي كمان
شهد .. وهيعرفوا منين اني كدابه ؟!!
الام .. انا هروح احكيلهم علي كل حاجة
شهد .. ويهون عليكي بنتك حبيبتك يا ماما يحبسوها ؟!!
الام .. مش هتجبيها لبر يا بنت بطني .. ابوكي راقد عيان بسببك .. يا تري هتعملي فينا ايه تاني ؟!!
شهد .. متخفيش يدوب هتدخلي العناية المركزة
الام .. بقي كدا يا شهد ؟!!
شهد .. ماما .. والنبي تعبانه وعايزة ارتاح .. سيبيني دلوقتي وبعدين نتكلم
الام .. حاضر يا شهد .. بس انا بقلك اهوه روحي اتنازلي عن البلاغ وكفاية مشاكل من تحت راسك
شهد .. ماما قلتلك نتكلم بعدين
الام تترك شهد وتنصرف .. شهد تبعث رسالة للشيطان .. ايه رأيك ؟!!
الشيطان يرد .. زي الفل
شهد .. وبعدين ايه الخطوة الجاية ؟!!
الشيطان .. هما هيودوكي الطب الشرعي وهناك هيعرفوا انك مش عذراء .. كدا انتي مش كدابه
شهد .. بس علاء انكر كل حاجة
الشيطان .. هو انتي عاوزاه يعترف بحاجة معملهاش ؟!!
شهد .. طب وبعدين ؟!!
الشيطان .. سيبي الدنيا ماشية زي ما هي .. المواضيع دي بتطول بس هتكسبي تعاطف ناس كتير اغبيا هيصدقوا ان علاء عمل كدا
شهد .. علي رأيك واحنا شعب نطلع الاشاعة ونصدقها وما نصدق نلاقي مصيبة ونمسك فيها
الشيطان .. وكله لمصلحتنا .. المهم جاهزه للمصيبة التالتة؟
شهد .. قول يا جلاب الهنا
الشيطان .. استاذ كمال المدرس عندكم في الجامعة
شهد .. مستر كمال درويش ؟!!
الشيطان .. ايوه هو بعينه بغباوته .. هههه
شهد .. وماله دا كمان ؟!!!
شهد .. ماله مستر كمال درويش ؟!!
الشيطان .. عايزه يطلق مراته .. بقاله ٣٠ سنه مزعلهاش مرة واحدة وكل سنة يحتفل بعيد جوازه وهارينا هما الاتنين صور علي الفيس .. كأنهم لسه متجوزين
شهد .. هتقلي عايش فيها دور حبيبي دائما
الشيطان .. عشان كدا لازم يطلقوا انهاردة
شهد .. والمطلوب مني ايه يا خراب البيوت ؟!!
الشيطان .. بكره عامل حفله في فيلته بيحتفل بعيد جوازه التلاتين .. هتكوني انتي اول المدعويين ومش هقلك بقي تعملي ايه .. انتي اكيد فاهمه
شهد .. تمام .. يا عيني عليك يا دكتور كمال ..اخر عيد جواز تحتفل بيه
وبالفعل ذهبت شهد الي الحفلة في اليوم التالي ترتدي فستان قصير وقبلها بيوم ظلت طوال الليل ترسل له رسائل من رقمها رسائل كلها حب وغرام ولكن مستر كمال لا يعير تلك الرسائل اهتماما لانه لا يعرف من الراسل وظن انها معاكسات .. وعندما دخلت الي الفيلا ورأت كمال وزوجته سويا قالت
شهد .. برضوا كدا يا كموله الليل كله ارن عليك وابعتلك رسايل متردش عليا ؟!!
كمال متعجب .. انتي مين يا انسة ؟!!
شهد .. بقي كدا لحقت تنساني ولا عامل مش عارفني .. انا شهد تلميذتك النجيبة
كمال .. اهلا شهد
شهد .. مين دي ؟!!
كمال .. دي المدام
شهد .. اه .. هي دي القرشانة اللي كلمتني عليها
المدام .. قرشانة ؟!! مين دي يا كمال ؟!!
كمال .. معرفهاش .. بس بتقول طالبة عندي
المدام .. ورسايل ايه اللي بتبعتهالك علي الموبيل ؟!!
كمال .. ايه .. مش عارف .. انتي بعتيلي رسايل يا بنتي ؟!!
شهد .. يا عم خلاص بقي متخبيش قلها ان احنا بنحب بعض
المدام .. بتحبوا بعض!! وريني الموبيل بتاعك
ثم تراجع سجل الرسائل فتجد رسائل فعلا مرسله موقعة باسم شهد .. تقرا فلا تستطيع ان تكمل لفظاعة تلك الرسائل
المدام .. ايه حكاية الرسايل دي ؟!!
كمال .. معرفش انا فكرت حد بيعاكس
المدام .. طب مقلتليش ليه ؟؟!
كمال .. محبتش اشغلك .. عادي جدا
شهد .. ايه اللي بتقوله ده يا كمولة ؟!! انا بعاكس برضوا!!! .. بصراحة انت تتعاكس يا جميل .. قلي بقي خلاص ناويت نسافر مع بعض شرم الاسبوع الجاي؟
المدام .. شرم ؟!!
شهد .. اه ما احنا هنقضي اسبوعين عسل هناك بعد الجواز
المدام .. بعد الجواز ؟!! انت مش قلتلي ان امك تعبانه في البلد وهتاخد اسبوعين اجازة عشان تسافر وتقعد جمبها
شهد .. اغص عليك يا كمولة .. انت مش قلتلي انك هتقول لمراتك علي كل حاجة وقصة الحب الجبارة اللي بينا واننا قررنا نتجوز خلاص
المدام ..حب وجواز وبتضحك عليا وعاملي عيد جواز وانت ناوي تتجوز عليا واحدة اد بنتك !!! اه يا شايب يا عايب .. طلقني يا كمال
كمال .. اطلقك ؟!! انتي بتقولي ايه يا نورهان .. دا انا بموت فيكي وما استغناش عنك
المدام بسخرية .. ما انت استغنيت خلاص وبصيت لوحدة من دور بناتك .. يا اخي اختشي علي دمك دا انت بقيت جد .. طلقني يا كمال يا اما هعملك فضيحة قصاد الناس كلها ثم تتركه وتنصرف
شهد .. رايحة فين يا طنط ؟!! طب قليلي مبروك
كمال .. الله يخرب بيتك .. انتي مين وجيتي من انهي داهية
شهد ..بعد اذنك يا اونكل عشان مستعجلة.. بااااي وابقي سلملي علي طنط نورهان
جلست شهد امام اللاب توب وهي تشعر بنشوة الانتصار بعد ان نجحت في فعل المصيبة رقم ٣ وبعثت رسالة عبر الماسنجر الي الشيطان مكتوب فيها تم
الشيطان .. شاطرة يا شهد .. فعلا تستحقي تكوني الانتيم بتاعي بنت داهية بجد
شهد .. عجبتك ؟
الشيطان .. لو افعالك دي معجبتش الشيطان هتعجب مين يعني ؟!!
شهد .. عملت ايه في الفيزا اللي وعدتني بيها ؟
الشيطان .. جاهزة بس اتفقنا تخلصي الخمس مصايب زي ما اتفقنا
شهد .. حاضر .. بس في حاجة غريبة .. انا ليه مصدقاك وبسمع كلامك .. مع انك بتحرضني علي فعل المصايب
الشيطان .. هههههه .. اسألي نفسك السؤال ده وعلي فكره اجابة السؤال ده موجودة من ١٤٠٠ سنة
شهد .. موجودة !! ومن ١٤٠٠ سنة .. موجودة فين ؟!!
الشيطان .. اسألي نفسك .. دوري
شهد .. انا لسة هدور .. فكك .. قلي بقي ايه المصيبة الرابعة
الشيطان .. جربتي تشربي مخدرات ؟!!
شهد .. لا
الشيطان .. بقي عملتي كل المصايب ومحاولتيش تشربي مخدرات ؟!!
شهد .. يعني مجتش في دماغي
الشيطان .. اهو جه وقتها .. عاوزك تشمي هيروين كل يوم ولمدة اسبوع
شهد ..هيروين !!!
الشيطان .. اه بودره يعني .. ايه خايفة؟!!
شهد .. بلاش كلمة خايفة دي عشان انت عارف ومتأكد اني مبخفش وبعمل اي حاجة
الشيطان .. خلاص .. عرفة هتجبيها منين ؟!!
شهد .. عرفه مع اصحاب كتير في الكلية
الشيطان .. نتقابل بعد اسبوع وتوصيفيلي احساسك ايه
وبالفعل نزلت شهد الكليه وتقابلت مع احدي صديقاتها المدمنات وطلبت منها ان تحضر لها جرعات من الهيروين تكفيها اسبوع واخذت جرعة كل يوم ومر الاسبوع واصبحت شهد مدمنة
شهد تبعث رسالة للشيطان ...تمام خلاص بقيت مدمنه عشان تنبسط
الشيطان .. ههههههه .. ايه رأيك في الادمان يا شهد
شهد .. دنيا تانيه بصراحة احساس بياخدك بعيد..
الشيطان .. فعلا بياخدك سكة اللي يروح ميرجعش
شهد .. اخلص ايه المصيبة الخامسة
الشيطان .. تسجلي فيديو ليكي وتحكي فيه كل المصايب اللي عملتيها دي وتشيريها ع مواقع التواصل الاجتماعي وشوفي تعليقات الناس.
شهد .. نعم يا روح امك .. انت اتجننت .. عايزني افضح علي الملأ !!!!
الشيطان .. ليه هو انتي شايفة اللي عملتيه غلط وحاسة انه هيسببلك فضيحة ؟!!
شهد .. امال اللي عملته صح ؟!! طبعا غلط
الشيطان .. طب عملتيه ليه يا شهد ما دام غلط وخايفة الناس تعرفه ؟!!
شهد .. انت مال امك .. شوف حاجة تانية غير دي
الشيطان .. للأسف لازم تنفذي ودا كان اتفاق
شهد .. وانا مش هعمل كدا
الشيطان .. خلاص يبقي مفيش فيزا لاميريكا.. وافتكري اني قلتك لو تراجعتي هتشوفي مني وش تاني مش هيعجبك
شهد .. طظ فيك وابقي وريني هتعمل ايه
وتمر الايام وشهد تعاني اثار المصائب التي قدمتها حيث ان المحكمة قد برأت علاء من تهمة اغتصابها بعد ان شهدت الام ضدها ووقفت الي جانب علاء واخبرت المحكمة ان ابنتها كانت متزوجة عرفي وقام علاء بعدها برفع دعوي ضد شهد لتشويه سمعته يطالب فيها بالتعويض اما الاستاذ كمال التي حاولت ان توقع بينه وبين زوجته قام بتعندها وسقطها في مادته واصبحت شهد تعاني من آلام الادمان وتحتاج الي جرعة يومية اذا تأخرت عنها يصبح جسدها يؤلمها بشدة فأصبحت اسيرة الادمان والطامة الكبري انها شعرت بشئ ما يتحرك في احشائها وبعد ان فحصها الطبيب اخبرها بأنها حامل في شهرين .. نعم لقد حملت من وائل وبدأت تكبر بطنها وحاولت التخلص من الجنين لم تستطع انفضح امرها ولم احد يصدق انها كانت متزوجة عرفي تدهورت حالتها النفسية ولم يكن لها ملجأ الا ان تسمع كلام الشيطان وتسجل الفيديو كما طلب وتشيره حتي يأتي لها بالفيزا كما وعد وبالفعل فعلت ذلك وشيرت الفيديو الذي تحكي فيه مصائبها ولاقت من اللوم والسخرية والعتاب ما لاقت ممن شاهدوا الفيديو بعثت رساله للشيطان .. انا عملت اللي قلت عليه فين وعدك ليا .. فبعث الشيطان رسالة مضمونها تلك الاية الكريمة .. وقال الشيطان لما قضي الامر ان الله وعدكم وعد الحق ووعدتكم فاخلفتكم وما كان لي عليكم من سلطان الا ان دعوتكم فاستجبتم لي فلا تلوموني ولوموا انفسكم .. صدق الله العظيم .
شهد .. يعني ايه الكلام ده ؟!! فين الفيزا
الشيطان .. مفيش فيزا ..كنت بضحك عليكي
شهد .. ازاي وخلتني ليه اعمل دا كله ؟!!
الشيطان .. انا قلتلك اعملي وانتي اللي عملتي بمزاجك حتي لما مقبلتيش تنفذي المصيبة الخامسة وقلتلك هتشوفي وش تاني سكت لاني مكنتش اقدر اعمل حاجة وانتي برضوا اللي رجعتيلي بمزاجك وعملتي الفيديو وشيرتيه
شهد .. انت مين انطق؟
الشيطان .. انا حسين اللي في العمارة اللي قدامكم فاكرة لما اتريقتي عليا زمان عشان دقني الطويلة والتزامي وقلتي عليا رجعي ومتخلف !! حبيت اديكي درس ركبتلك سماعات في اوضتك عشان اسمع كل كلمة بتقوليها اما كنت بشوفك ازاي فدا من شباك اوضتك اللي قصادي اللي عمره ما بيتقفل حتي وانتي بتتغيري هدومك .. علي فكرة انا معملتش حاجة غير اني كنت بحرضك وانتي اللي بتنفذي بالظبط زي الشيطان ما بيعمل يوسوس للانسان بس وهو ينفذ ولو ربنا جه في بالك مرة واحدة مكنتيش عملتي كدا .. للأسف تستحقي ان تكوني فتاه سجد لها الشيطان لانك اطعتيه في اوامره .. ارجعي لربنا يا شهد واستغفريه عن كل حاجة عملتيها لان لا ملجأ من الله الا اليه .. توبي يا شهد قبل فوات الاوان .....
انتهت القصة علي وعد بقصة شيقة اخري .. هل استحق عشر ملصقات وشارك حتي يستفيد غيرك ..